ကချင်ပြည်နယ်အတွင်းရှိ စာပေနှင့်ယဉ်ကျေးမှုကော်မတီများထံ တိုင်းရင်းသားပုံပြပုံပြင်စာအုပ်များဖြန့်ဝေပေးအပ်

မြစ်ကြီးနား စက်တင်ဘာ ၂၄
တိုင်းရင်းသားလူမျိုးများရေးရာဝန်ကြီးဌာန၊ ကချင်ပြည်နယ် တိုင်းရင်းသားစာပေနှင့် ယဉ်ကျေးမှု ဦးစီးဌာနမှ ကချင်ပြည်နယ်အတွင်းရှိ တိုင်းရင်းသားများအတွက် တိုင်းရင်းသားဘာသာ ဖြင့်ထုတ်ဝေသည့် ပုံပြပုံပြင်စာအုပ်များကို ယနေ့ နံနက်ပိုင်းတွင် ပြည်နယ်အစိုးရအဖွဲ့ရုံး ဆမားဒူဝါဆင်ဝါးနော်ခန်းမ၌ စာပေနှင့်ယဉ်ကျေးမှုကော်မတီအဖွဲ့များထံ ဖြန့်ဝေပေးအပ်ခဲ့သည်။
ပုံပြပုံပြင်စာအုပ်များ ပေးအပ်ပွဲတွင် ပြည်နယ်အစိုးရအဖွဲ့ဝင် ဗမာတိုင်းရင်းသားလူမျိုးရေးရာ ဝန်ကြီး ဦးခင်မောင်မြင့်(ခ)ဦးဒိတ်က တိုင်းရင်းသားလူငယ်များ စာပေသင်ကြားရာတွင် သင်ယူတတ် မြောက်မှုလွယ်ကူစေရန် ယခုကဲ့သို့ ပုံပြပုံပြင်စာအုပ်များ ပေးအပ်နိုင်သည့်အတွက် တိုင်းရင်းသားလူမျိုး တစ်မျိုးချင်းစီ၏ စာပေဖွံ့ဖြိုးတိုးတက်ရေးကို ဆောင်ရွက်ရာတွင် အထောက်အကူပြုနိုင်မည်ဟု ယုံကြည် ကြောင်း ပြောကြားသည်။
အဆိုပါ ပုံပြပုံပြင်စာအုပ်များကို ပြည်နယ်တိုင်းရင်းသားလူမျိုးရေးရာဝန်ကြီးများနှင့် ပြည်နယ် လွှတ်တော်တိုင်းရင်းသားလူမျိုးများအရေးဆိုင်ရာကော်မတီဥက္ကဋ္ဌ၊ ဌာနဆိုင်ရာတာဝန်ရှိသူများ၊ယူနီဆက် မြန်မာမှ တာဝန်ရှိသူတို့က တိုင်းရင်းသား ဘာသာ၊ မြန်မာဘာသာ(၂)မျိုးဖြင့် ပြုစုထားသော တိုင်းရင်း သားပုံပြပုံပြင်စာအုပ်စုစုပေါင်း ၂၃၇၄၆ အုပ်ကို ဘာသာရပ်အလိုက် သက်ဆိုင်ရာစာပေနှင့် ယဉ်ကျေးမှု ကော်မတီ (၁၀)ခုတို့ထံ အသီးသီးဖြန့်ဝေပေး အပ်ခဲ့ကြသည်။
ပုံပြပုံပြင်စာအုပ်များ ပေးအပ်ရခြင်းနှင့် ပတ်သက်၍ တိုင်းရင်းသားစာပေနှင့် ယဉ်ကျေးမှုဦးစီးဌာန ဒုတိယဦးစီးမှူး ဦးခင်မောင်ထွန်းက “ ပြည်နယ်မှာရှိတဲ့ စာပေနှင့်ယဉ်ကျေးမှုကော်မတီအဖွဲ့ (၁၂)ဖွဲ့မှာ ဒီနေ့ (၁၀)ဖွဲ့အတွက် စာအုပ်ပေါင်း ၂၃၇၄၆ အုပ်ကို ယခု ၂၀၁၉-၂၀၂၀ ပညာသင်နှစ်အတွက် ပေးအပ်မှာ ဖြစ်ပါတယ်၊ ဒါ့အပြင် ၂၀၂၀-၂၀၂၁ ပညာသင်နှစ်နှင့် ၂၀၂၁-၂၀၂၂ ပညာသင်နှစ်များတွင် ဆက်လက်ပေး အပ်သွားမှာဖြစ်ပါတယ်” ဟု ပြောပြသည်။
ပုံပြပုံပြင်စာအုပ်များကို ကလေးများသည် ပုံပြင်များကို စိတ်ဝင်စားသည့်အတွက်ကြောင့် ပုံပြင် နားထောင်ခြင်းနှင့် ပုံပြောခြင်းတို့သည် ဘာသာစကား သင်ကြားရာတွင် အရေးပါကြောင်း၊ ထို့အပြင် မိခင်ဘာသာစကား၊ တိုင်းရင်းသားဘာသာစကားကို ကျောင်းတွင် ဖွံ့ဖြိုးအောင်ဆောင်ရွက်ခြင်းဖြင့် ထိုဘာသာစကားကိုသာ ဖွံ့ဖြိုးစေသည်သာမက ကျောင်းသင်ပင်မဘာသာစကားတွင်လည်း ကလေးများ ၏ စွမ်းရည်များကို ဖွံ့ဖြိုးတိုးတက်လာအောင် အထောက်အကူပြုနိုင်မည်ဖြစ်ကြောင်း ထပ်မံရှင်းလင်း ပြောကြားသည်။
အဆိုပါစာအုပ်များတွင် တိုင်းရင်းသားဘာသာ၊ မြန်မာဘာသာ (၂)မျိုးဖြင့် ပြုစုထားခြင်းဖြစ်ပြီး ယနေ့ပေးအပ်လိုက်ခဲ့သည့်စာအုပ်များမှာ ကချင်မျိုးနွယ်စုများဖြစ်သည့်ဂျိန်းဖောဘာသာဖြင့် ၄၈၀၀ အုပ်၊ ရဝမ် ၃၆၀၀ အုပ်၊ လော်ဝေါ် ၃၁၂၀ အုပ်၊ လီဆူ ၂၁၀၀ အုပ်၊ ဇိုင်ဝါး ၄၈၀ အုပ်နှင့် လာချိဒ် ၁၄၇၀ အုပ်၊ ရှမ်းမျိုးနွယ်စုများဖြစ်သည့် တိုင်းလိုင်ဘာသာဖြင့် ၃၈၄၀ အုပ်၊ တိုင်းလေ ၂၈၀၈ အုပ်၊ တိုင်းခမ်းတီ ၁၀၈၀ အုပ်တို့အပြင် ဗမာဘာသာဖြင့် ၄၄၈ အုပ်တို့ကို ပေးအပ်ခဲ့ကြောင်း သိရှိရသည်။
Visitors: 22,168